मनपा कर्मचारी करणार कामबंद आंदोलन

नागपूर : २५ नोव्हेंबर - सातवा वेतन आयोग लागू करण्यासोबतच इतर अनेक मागण्यांना कायम केराची टोपली दाखविणाऱ्या मनपा प्रशासनाविरुद्ध आता मनपा कर्मचाऱ्यांनी कठोर आंदोलनाचे हत्यार उपसले आहे. हिवाळी अधिवेशनाच्या पहिल्या दिवसापासून मनपातील कर्मचारी कामबंद आंदोलन करणार आहेत. यासंदर्भातील कायदेशीर नोटीस मनपा प्रशासनास देण्यात आली आहे.

मुंबई औद्योगिक संबंध अधिनियम १९४६ कलम ४२ उपकलम २ अन्वये मनपातील राष्ट्रीय नागपूर कार्पोरेशन एम्प्लॉइज असोसिएशनने शिष्टमंडळास चर्चेची वेळ मागितली आहे. तसेच कर्मचाऱ्यांच्या मागण्यांबाबत चर्चा करून मागण्या मंजूर करण्याबाबत १४ दिवसांची नोटीस दिली आहे. संघटनेच्या जनरल कौन्सिलच्या सभासदस्यांच्या ५ नोव्हेंबरच्या तातडीच्या आमसभेत व कार्यकारिणी मंडळच्या १९ नोव्हेंबरच्या ठरावानुसार महापालिकेतील कर्मचाऱ्यांनी बेमुदत कामबंद आंदोलनाचा इशारा दिला आहे. या आंदोलनास मनपातील ४ हजार १८७ कर्मचाऱ्यांनी लेखी हमी देत आंदोलनात सहभागी होण्याचे ठरविले आहे. त्यामुळे वेळीच दखल घेऊन मागण्या मंजूर कराव्यात अन्यथा बेमुदत आंदोलन करण्याचा इशारा संघटनेचे अध्यक्ष सुरेंद्र टिंगणे, सरचिटणीस रंजन नलोडे यांनी संघटनेच्या सदस्यांच्यावतीने दिला आहे. आंदोलनाच्या निवेदनाची प्रत महापौर संदीप जोशी यांनाही देण्यात आली आहे.