नागपुरात उघडकीस आल्या दोन अल्पवयीन मुलींच्या बलात्काराच्या घटना

नागपूर: २५ नोव्हेंबर - युवकाने अत्याचार करून १६ वर्षीय मुलीला गर्भवती केले. ही घटना गिट्टीखदान भागात उघडकीस आली. दुसऱ्या एका घटनेत ३९ वर्षीय घरमालकाने सात वर्षीय बालिकेवर बलात्कार केला. हा प्रकार पारडीत उघडकीस आला.

पहिल्या घटनेत गिट्टीखदान पोलिसांनी ऋषभ प्रेमानंद इंदुरकर (वय १८ रा. आझादनगर) याच्याविरूद्ध अत्याचारासह विविध कलमान्वये गुन्हा दाखल केला. पीडित मुलगी दहाव्या वर्गात शिकते. ऋषभही शिक्षण घेत आहे. जून महिन्यात ऋषभ याची पीडित मुलीसोबत ओळख झाली. त्याने तिला प्रेमाच्या जाळ्यात ओढले. लग्नाचे आमिष दाखवून तिच्यावर वारंवार अत्याचार केला. मुलगी गर्भवती राहिली. पोट दुखत असल्याचे तिने नातेवाइकांना सांगितले. नातेवाइकांनी तिला हॉस्पिटलमध्ये दाखल केले. मुलगी गर्भवती असल्याचे डॉक्टरांनी नातेवाइकांना सांगितले. ऋषभने अत्याचार केल्याचे तिने नातेवाइकांना सांगितले. नातेवाइकांनी गिट्टीखदान पोलिस स्टेशन गाठून तक्रार दिली. पोलिसांनी गुनहा दाखल करून ऋषभ याला अटक केली.

दुसऱ्या घटनेत घरी कोणी नसताना ३९ वर्षीय घरमालकाने सात वर्षीय मुलीवर अत्याचार केला. हा संतापजनक प्रकार सोमवारी रात्री पारडी भागात उघडकीस आला. याप्रकरणी पारडी पोलिसांनी अत्याचारासह विविध कलमान्वये गुन्हा दाखल करून घरमालकाला अटक केली. पीडित मुलगी आई-वडिलांसह भाड्याने राहाते. सोमवारी सायंकाळी पीडित मुलीची आई व आरोपीची पत्नी बाजारात गेल्या. यादरम्यान घरमालकाने मुलीवर अत्याचार केला. रात्री आठ वाजता मुलीची आई घरी परतली. मुलगी रडत होती. विचारणा केली असता घरमालकाने अत्याचार केल्याचे मुलीने आईला सांगितले. मुलीसह आईने पारडी पोलिस स्टेशन गाठून तक्रार दिली. पोलिसांनी गुन्हा दाखल करून घरमालकाला अटक केली. घरमालकाची २७ नोव्हेंबरपर्यंत पोलिस कोठडी घेण्यात आली आहे.