जयपूरच्या आयकर विभागाकडून १४०० कोटींचा बेनामी व्यवहार उघड

जयपूर : २४ जानेवारी - आयकर विभागाने सराफा आणि दोन स्थावर मालमत्ता व्यावसायिकांवर छापेमारी करून १४०० कोटी रुपयांचा बेनामी व्यवहार उघडकीस आणला आहे. आयकर विभागाची ही आजवरची सर्वांत मोठी कारवाई आहे, अशी माहिती केंद्रीय प्रत्यक्ष कर मंडळाने (सीबीडीटी)  दिली.

या दोन्ही व्यावसायिकांच्या ३१ पैकी २१ ठिकाणांवर आयकर विभागाने गुरुवारी छापेमारी केली. एका स्थावर मालमत्ता व्यावसायिकाने मागील सहा ते सात वर्षांपासून केलेल्या बेनामी व्यवहारांचे तपशील व्यवसायाचे प्रमुख केंद्र असलेल्या इमारतीच्या तळमजल्यात दडवून ठेवले होते, अशी माहिती सीबीडीटीने दिली.

या छापेमारीवेळी कित्येक गुन्हेगारी स्वरूपाचे दस्तावेज आणि डिजिटल डाटा बेहिशेबी पावत्या, बेनामी विकास खर्च, बेनामी संपत्ती, रोख कर्ज व अग्रीम, रोख स्वीकारल्याच्या पावत्यांच्या स्वरूपात आढळला. या समूहाने केलेल्या ६५० कोटींच्या बेनामी व्यवहारांची माहिती आतापर्यंत उघड करण्यात आली, असे सीबीडीटीने जारी केलेल्या निवेदनात म्हटले आहे.

व्यावसायिक केंद्र, फार्म हाऊस, टाऊनशिप आणि निवासी बंगले बांधणार्या एका स्थावर मालमत्ता कंपनीवरही छापेमारी करण्यात आली. एअरपोर्ट प्लाझा येथील एका प्रकल्पात या कंपनीने केवळ एक लाख रुपयांची गुंतवणूक केल्याची नोंद खातेवहीत केली आहे, तर ताळेबंदात १३३ कोटी रुपये दिसून आले. या कंपनीने १९ कोटी रुपयांचे बेहिशेबी कर्ज दिल्याचे आढळले. या कंपनीचा २२५ कोटी रुपयांचा बेनामी व्यवहार उघडकीस आला.

सराफा व्यावसायिकाकडे भुयार

जयपूर येथे एका सराफा व्यावसायिकाकडे एक भुयार सापडले आहे. यात तब्बल ७०० कोटी रुपयांची संपत्ती असल्याचे आढळून आले आहे. आयकर विभागाची ही कारवाई पाच दिवस चालली. यामध्ये ५० पथके आणि २०० कर्मचार्यांचा समावेश होता. सलग पाच दिवस आयकर विभागाचे अधिकारी आणि कर्मचारी कागदपत्रांची छाननी करण्यात गुंतले होते.