अल्पवयीन मुलीवर अत्याचार केल्याप्रकरणी युवकाला अटक

नागपूर : २५ फेब्रुवारी - एका ३१ वर्षीय युवकाने १६ वर्षीय मुलीचे हातपाय बांधून तिच्यावर अत्याचार केल्याची घटना उघड झाली आहे. मुलगी गर्भवती राहिल्यानंतर ही घटना उघडकीस आली. याप्रकरणी मौदा पोलिसांनी अत्याचारासह विविध कलमान्वये गुन्हा दाखल करून अत्याचारी युवकाला अटक केली. विशाल मेश्राम, असे अटकेतील युवकाचे नाव आहे. विशाल हा सिमेंट कंपनीत काम करतो.

पीडित मुलगी शिकत आहे. पाच महिन्यांपूर्वी पीडित मुलगी घरी एकटी होती. विशाल हा मुलीच्या घरात घुसला. दोरीने तिचे हातपाय बांधले. तिच्यावर अत्याचार केला. याबाबत कोणाला सांगितल्यास ठार मारण्याची धमकी दिली. 

काही दिवसांपूर्वी मुलीची प्रकृती खालावली. नातेवाइकांनी तिला हॉस्पिटलमध्ये दाखल केले. मुलगी गर्भवती असल्याचे डॉक्टरांनी मुलीच्या नातेवाइकांना सांगितले. नातेवाइकांनी विचारणा केली असता, विशाल याने अत्याचार केल्याचे तिने नातेवाइकांना सांगितले.

त्यानंतर मुलीसह नातेवाइकांनी मौदा पोलिस स्टेशन गाठले. विशाल याच्याविरूद्ध तक्रार दिली. मौदा पोलिसांनी विशाल याच्याविरूद्ध गुन्हा दाखल केला. मौद्या पोलिस स्टेशन पोलिस निरीक्षक (गुन्हे) विजय जाधव यांच्या मार्गदर्शनाखाली मौदा पोलिसांनी विशाल याला अटक केली.